Бүгүн, 2024-жылдын 26-декабрында Республиканын сот приставдарына республикалык бюджеттен сатылып алынган 54 даана жаңы “Шевроле Трекер” үлгүсүндөгү кызматтык автоунаалар тапшырылды. Иш чарага Кыргыз Республикасынын Министрлер Кабинетинин төрагасы Адылбек Касымалиев, Кыргыз Республикасынын Жогорку сотунун төрагасы Медербек Сатыев, Кыргыз Республикасынын Жогорку сотуна караштуу Сот департаментинин директору Урмат Кожомбердиев, директордун орун басарлары Джылдыз Рыскулова, Канат Осмонов, Сот департаментинин кызматкерлери, Бишкек шаарынын жана облустардын Сот приставдары кызматынын өздүк курамы катышышты. Министрлер Кабинетинин төрагасы Адылбек Касымалиев өз сөзүндө: “Ушундай көпчүлүк күткөн жакшы майрамдын алдында Сот приставдар кызматы жаңы унаалуу болгону турасыздар. Бул дагы бир жолу өлкөнүн материалдык-техникалык базасы чыңдалып жатканын тастыктайт. Күчтүү материалдык-техникалык базалар – күчтүү мамлекеттин белгиси, демек, ыкчам өнүгүүлөргө түрткү болот.”— деп баса белгилөө менен Сот приставдар кызматына алынган 54 кызматтык автоунааны мамлекеттик бюджеттин эсебинен 102 млн 898 миң сомго сатып алынганын айтты. Ал эми Жогорку соттун төрагасы Медербек Сатыев сот приставдарына автоунаалардын ачкычтарын тапшыруу салтанатында: «Өлкөбүздүн Сот приставдар кызматы түзүлгөндөн тартып биринчи жолу тарыхта “Тулпар моторс” ишканасынан чыгарылган “Шевроле Трекер” маркасындагы 54 даана жаңы кызматтык автоунааларды тапшыруу алдында турабыз. Кыргыз Республикасынын Президенти Садыр Нургожоевич Жапаровдун колдоосу менен бир жыл мурун сот аткаруучуларга 47 автоунаа алып берсек, азыркы күндө Сот приставтарга өз өлкөбүздө чыгарылып жаткан 54 кызматтык автоунаа сатып алдык. Бул кызматтык автоунаалар Сот приставдарынын күнүмдүк кызматтык милдеттерин натыйжалуу жана так аткаруу жардам берет деп ишенебиз», – деп белиглеп өттү. Эскерте кетсек, Кыргыз Республикасынын аймагында 55 Сот аткаруучулар кызмат бөлүмдөрү бар, өлкө боюнча жалпы 449 сот приставдар кызмат кылат, алардын ичинен 1 Кыргыз Республикасынын Башкы сот приставы — Кыргыз Республикасынын Жогорку сотуна караштуу Сот департаментинин директорунун орун басары, 8 Бишкек шаарынын жана облустардын улук сот приставдары жана 55 бөлүмдөрдүн улук сот приставдары иш алып барышат.